百萬港人上街反送中惡法，數以萬計手無寸鐵市民再和平包圍立法會，全面反映反惡法已經係香港主流聲音，雖然保皇黨聲稱自己都有80萬人網上聯署支持，但就被IT界踢爆人數原來係靠計時器推動，只要做啲手腳，動員80億人都不是夢。
唔表態當支持
唔知係咪見到反對送中聲音越來越大，建制勢力都要採取「緊急措施」。有老友就同八方報料，噚日下晝兩點幾收到香港各界婦女聯合協進會嘅傳真，要各團體會員表態譴責暴力行為同支持一齊喺報紙登廣告撐修例，仲講明要四點前回覆，唔係就會視作同意，即係連沉默唔表態嘅自由都冇。
呢個香港各界婦女聯合協進會其實上個月先登過全版廣告，當日係對胡志偉侮辱林鄭言論表達遺憾，之所以咁多錢登廣告，皆因個會有大水喉射住，主席係賭王千金、信德主席何超瓊，永遠贊助人之一係前特首夫人梁唐青儀，連監察顧問同名譽顧問都係「紅」人，包括范徐麗泰、梁愛詩同民建聯主席李慧琼等，咁梗係要寧左勿右跟車最貼啦！