前些時，左丁山應邀介紹一位倫敦物業經紀行畀一位老友認識，因老友見到目前香港咁嘅環境，心思思想分散投資，調走部份資金也。有錢人有此想法，一啲都唔奇，最初劉鑾雄都要提司法覆核啦，仲要申請搵英國權威大狀來港做代表，律政司不服，要上法庭㖭，點知西環吹雞，田北俊話：「早啲講吖，咪歸邊囉」，於是情勢急轉直下，法庭雖然批准英國御用大狀來港代表大劉，大劉還是宣稱愛國愛港，撤銷司法覆核，令政府不致尷尬。林鄭特首與西環對商界提提意見就肯聽，對其他界別聲音就一於充耳不聞，代價係乜？田大少對南華早報講：「None……care about Lam. They only adhere to the Liaison Office，」又聲稱：Her game is over（南華早報6月7日）。林鄭月娥押上了個人政治公信力，輸個清光，如田大少所言，「建制派政客與商人只聽西環的，不理會林太，佢已經遊戲玩完」。
林鄭是否已經為逃犯條例而玩完，大概冇乜人關心（或者因此而恐懼CY回朝），目前有不少中產關心移民，繼靚女M話要研究到東南亞買樓之後（唔怪得檳城一個樓盤賣得好勁，電台廣告人員透露嘅！），師奶D居然打電話嚟叫介紹可信賴的移民顧問，左丁山從未搞過移民，唔識得移民顧問，梗係推得就推。問師奶D好地地搞乜鬼移民？師奶D話：「坦白講，我老公做生意做得幾好，叫做不愁衣食，從來少理世事，但老公最近同幾位相熟醫生朋友食飯，佢地都話好嬲林鄭，參加6月9日遊行。老公為之震驚，叫我得閒就去探路，做一啲移民研究喎！」名醫有乜好驚？佢地都未上過大陸做生意，又唔係記者文化人，怕乜呀？後來左丁山問一位21世紀畢業嘅新進醫生，佢話：「我服務於醫療集團，有不少內地病人攞雙程症來港睇病打針，生意好好。但我地老細級嘅股東名醫，與私家醫院掛鈎，病人盡是內地富豪，多數有香港身份證，聽講呢啲富豪正在部署撤離香港喎！」唔駛新進醫生講，左丁山若是內地富豪住在南區或山頂，都會設計一個應變計劃，銀行界消息話暫時益咗新加坡，人地悶聲發財。
問師奶D有冇簽獅奶聯盟，佢問乜嘢嚟㗎？即係葉劉話：驚老公包二奶呀嗰個呢？師奶D話： 「啋，有老公包二奶好過冇咗老公呀！」師奶心，好難測！