由特首林鄭月娥一手炮製嘅「送中」大龍鳳，破綻多又唔賣座，偏偏佢堅持如期上映，一眾司局長及建制派等大配角惟有按住導演要求繼續hard sell。食得鹹魚抵得渴，俾市民離棄就預咗，但佢哋唔知有冇預計到返工條路都會受阻？噚日朝早喺龍和道，八方同事就見到掛有AM85車牌嘅政府座駕一度俾示威人士「圍觀」，去路稍為受阻，但之後仍能駛離現場，據知呢架AM85為環境局局長黃錦星嘅座駕喎。
唔知大嘥鬼局長噚日返工有冇因此延誤或者不便呢？八方特別向環境局查詢，發言人回覆話「黃錦星局長平安，多謝關心」。平安就好喇，希望所有反送中示威者，同樣平平安安，天佑香港。