公關靚女M突然間離開服務機構，用時興術語，話take a break，唞一唞氣，話近年工作幾辛苦喎！真瀟灑，問佢去邊度旅行，會唔會去東歐流浪三個月，點知佢話一聲話走，即刻有offer自動湧到，令佢好為難，一時之間唔可以話飛就飛。有料之人有麝自然香，靚女M就係人辦。
靚女M平時對左丁山幾幫忙，聽到佢已經離開咗公司，大把時間到中環行街，不再受時間約束，於是約佢吃午飯，到文華酒店25樓Pierre欣賞無敵海景。此日上午天文台發出黃雨警告，跟住有雷暴警告，點知直至下午一點幾，中環還是陽光猛烈，從Pierre望落維港，似是水波不興，究竟天文台預測係唔係發出時間有誤呀？靚女M話有事遲到，於是細讀所有短訊，知道幾位老友記當晚相約往維園，其中一位係富翁V，平時絕少出動，乜乜靜坐、遊行、示威皆與佢無緣，點解今次會去維園，原來佢講到：「今次唔去唔得！」今次有乜事？靚女M嚟到，同佢提起，靚女M話：「九成九係佢為逃犯送中條例啦，唔止富翁級數呀，我係中產，有好多中產朋友呢排突然流行講到外地買樓退休，及去KL、曼谷、墨爾本、福岡、台灣，甚至柬埔寨睇樓都有，主要原因係送中條例令佢哋覺得2047年提早來臨。」
唉，林鄭月娥、張建宗、鄭若驊、李家超四人組點會相信呢類「傳言」呀，佢哋嘅反應一定係：「唔好誤解，受誤導，聽我哋解釋。」解釋有好多嘅，包括大公文匯嘅長篇大論及商台嘅時事評論員黃永在信報及經濟日報嘅長文，唔明講到你明。只可惜靚女M及我等IQ低之人，硬係唔明白一個以黨委書記為領導嘅地方，法官要聽黨委書記的話，點樣會有司法公正，司法不受政治影響呢回事？李局長話傳媒與法律界人士都有誤解，吾等小民更無資格明白啦。資深大律師陳景生係林鄭港大大師兄，佢都唔明受誤導，想向林鄭當面請教又被拒絕，其他人仲有乜好講，可能另一位港大Law友湯家驊可以點醒佢啩！想話輕鬆食餐靚飯，點知靚女M都話想去外地買樓，幾影響食慾，好彩當時天公造美，陽光普照維港，景色可餐，香港有如此美景，點捨得永遠離開！可嘆啊，遙望遠處獅子山下開始迷濛，東方之珠行將光芒漸淡，CY之後有位CL，將香港變成另一個CC（China City），夫復何言。