民意唔夠，惟有出動銀彈。噚日香港除咗兩份主要左派報章《文匯報》同《大公報》，就連《星島日報》甚至《明報》都喺頭版支持送中條例（圖）。
吓，乜《明報》都同左報一樣立場咩？睇真啲，原來係由唔少人大、政協聯同商界代表成立嘅「保公義撐修例大聯盟」揀正喺民陣大遊行正日，喺呢四份報章買下頭版全版廣告，以「支持修例 不做逃犯天堂」為主題，話要理性討論、彰顯公義同釐清真相，廣告下方仲附帶二維碼（QR Code），呼籲市民進入大聯盟官方網站聯署，支持修例。不過《蘋果》早前測試過，只要輸入正確驗證碼，其他資料亂填都可以成功聯署，有灌水之嫌。
八方同事噚日觀察維港兩岸，見到至少三座大廈嘅電子屏幕亦有咗撐修例廣告。錢雖然買好多嘢，但至少買唔到民心，睇吓噚日維園至立法會路上有幾多足印就知啦！