噚日遊行未開始前，原來鬧市已先上演反送中宣傳戰。八方收到報料，前晚深夜喺多個地點，包括旺角彌敦道兩旁嘅多間銀行外牆、玻璃同拉閘外面貼晒數以百計嘅反送中海報，當中以銀行最多，因為大家知星期日銀行唔開門，冇人會撕走海報，咁就可以貼足一日。
被「佔領」嘅以中資銀行為主，包括中國建設銀行、中信銀行、中銀香港、上海商業銀行，另外華僑永亨銀行、富邦銀行、東亞銀行、星展銀行、大眾財務等都被攻陷，吸引唔少途人駐足觀看。海報主要分三款，以黑白兩色作主題，呼籲市民企出嚟參加噚日嘅大遊行，向送中惡法說不。其中一款海報更印有「守護香港、撤回惡法、林鄭下台」口號。