歐盟同多個外國政府及機構早前先後發聲，反對《逃犯條例》修訂，德國駐港總領事館繼上月喺facebook貼出該國《基本法》第一條「人之尊嚴不可侵犯，尊重及保護此項尊嚴為所有國家機關之義務」，藉德國《基本法》70周年之慶諷刺港府後，噚日朝早趁民陣發起大遊行反送中惡法之際再次「出招」，喺fb貼出德國《基本法》第八條「集會自由」，教大家德文「die Versammlung」代表集會，英文即係「Assembly」，似乎間接聲援港人上街噃。
噚日德國駐港總領事館藉教網友德文嘅「每周一字」，強調集會自由嘅重要，話該國《基本法》第八條規定，所有德國人都有和平同唔攜帶武器集會嘅權利，毋須事前報告或許可；露天集會嘅權利可以立法或根據法律限制。
近4,000網民讚好
有關帖文附上連結教相關讀音，噚日傍晚已獲得近4,000位網民讚好，之後仲特別加咗句：「有鑑於個別傳媒報導（道），總領事館希望澄清這帖文並非為6月9日遊行作出呼籲」，唔少網民覺得欲蓋彌彰。