潘世亨近年全面拓展hip style品味生意，與陳冠希合資的潮店Juice，香港、台灣、北京、上海和成都都有店，最近更落戶洛杉磯，自己還跨界搞咖啡店、拉麵舖、和牛高級食肆，可以用「hip」形容他開拓潮人品味的生活態度。
撰文：梁錦雯
攝影：周樂恒
潘世亨（Kevin）是衝出香港的國際潮人代表人物之一，人稱KP的他最廣為人知是與陳冠希（Edison）合夥打造自家潮牌，並與如Nike、Converse聯乘，近年還與國際時裝品牌合作。38歲的KP，自言已走向「大叔」之齡：「自己心境28歲，朋友笑我得23歲。」在潮流創意工業十多年，他的客人層面已由kidult伸延到millennials，他也站穩insider前線，分享這圈子的survival guide時，他深入淺出說：「第一，唔好咁易放棄，可以嘅話，一放棄就冇啦，同埋一定要成日變，唔好太過保守，有時要take risk，例如𠵱家網店好流行，你都要搞，又好似𠵱家我哋office搞緊WeChat舖頭，隨着時間變化，跟住步伐，尤其做潮流嘅嘢。」
畀意見年輕人
睇軟硬林海峰、葛民輝長大、喜歡日本潮流文化，20歲的KP就膽粗粗與Edison開樓上舖，作為80後創業者，他坦言：「初頭係食好多屎，食得多就會大，同埋你唔會好介意，有問題嘅時候你識點應付，但眨吓眼就十年，都非常之快，都好感恩好多人畀啲機會我發揮空間，轉捩點就係05年同Nike聯名，我哋個牌子仲係好細，一瞬間全世界好多人知道，每日都有好多好好機會，睇你點把握。」
如何做後生仔的生意，應該是KP時常研究的課題，「𠵱家好後生嘅人係好懷舊，佢哋好鍾意90後、千禧後，可能我長大嘅時候Nigo、藤原浩係我哋偶像，可能佢哋都會睇住我哋，視我哋為榜樣，係非常開心，同盡量做多啲回饋番年輕人。好多時啲年輕人喺網上面搵我哋，問創業有乜tips、想開自己牌子，我哋都會畀啲意見。」
買嘢不為炒賣
將自己喜歡的事物做生意，就是KP投入創業的原因，他以前買落的Nigo設計、KAWS畫作、Supreme等產品，現在都成為國際拍賣所的人氣拍賣品，潮物具升值潛力，問到是否一個好的「理由」去消費，他說：「一代一代，因為消費年紀去到呢個階段，我都好意外，呢個階段好多嘢都發生得好快，我見到好開心，我哋細個鍾意嘅嘢已變咗係art piece，見到拍賣、有儲嘅潛力，同變咗一啲asset、art piece，figure又有、canvas又有、sculpture又有，乜都儲，講就講係會升值，一日未賣都唔知升定跌，但見到都開心，多咗人去吹捧，我真係鍾意先買，唔好淨係諗炒升值先去買一啲嘢，留番炒樓好過，𠵱家炒樓都好難。」
Andy Warhol的15分鐘成名論很切合現今社交平台文化， KOL越多like就越有商機，KP認為：「Instagram咁容易，當然啲人會post最好嘅一面，啲辛苦嘢，或落好多苦功，未必有人睇到，所以啲年輕人，睇到一分鐘成名，你睇Virgil Abloh、Nigo都好多年，唔係一日就可以做到最勁，一定有沉澱嘅期間，但我都會覺得social media好interesting，個個都係selfie generation，我都想睇，睇啲年輕人點解鍾意睇呢啲，我都嘗試去了解吓。」
講Edison做老竇後
打潮流江山十多年，不得不提KP二十多年戰友Edison，「佢係非常之有創意，同埋佢對好多嘢都好大膽，我都好欣賞佢，𠵱家佢做咗老竇，好多嘢relax咗啲，同埋佢有諗法。」問到有否不足之處，KP笑言：「大家互相尊重了解，一係唔好做，有時我就吓佢、佢就吓我，咁就十幾年，有時各有各做，最緊要大家有番創作空間，各有生意，各有各忙，又可以做啲嘢係為興趣。短處係𠵱家佢喺美國住，見面少咗好多，溝通上要花多啲努力，大家要主動搵大家。」有否留意余文樂、徐濠縈、周柏豪甚至古巨基都搞自家潮牌，他說：「有留意李璨琛Subcrew，徐濠縈啱啱開咗新舖頭，覺得佢哋好努力，希望佢哋大家非常之掂，其他就唔係好清楚， 越多人參與件事先越主流，我哋本身美國長大，希望美國、東南亞，甚至歐洲都會出現，可能呢個先係夢想，唔係問我係唔係想上市，我覺得唔係，其實係想全世界各地都有舖頭，有我哋啲嘢存在。」
同和牛大王合作
KP不是富二代，20歲就放棄打工念頭，走去創業做生意，他笑言：「我細個父母好嚴，買架單車都鬧，咪發憤自己賺錢，細個做吓暑期工、Intern賺吓錢，嗰時16歲為咗獨立，好鍾意做生意同諗嘢。」
碧咸打孖上
自言小時候有過度活躍症，故喜歡「做好多嘢」才滿足到自己，近年KP搞飲食，與東京和牛專門店Wagyumafia及「和牛大王」濱田壽人（Hisato Hamada）合資，在灣仔開設日本和牛食肆，店內有一小角賣和牛拉麵，另一邊就做廚師發辦的omakase高級餐廳，「好欣賞日本人做嘢精神，自己好鍾意食牛肉，就喺網上識了這間舖嘅日本老闆，佢好鍾意波鞋，又對潮流好有興趣，我就去日本拜訪佢。」這間和牛食店開業不夠一年，星級食客就有碧咸、KAWS主腦Brian Donnelly、劉嘉玲、楊千嬅等。談到碧咸都來幫襯，他說：「我哋朋友圈帶佢嚟，以我所知佢都係食肉獸，佢𠵱家成日去澳門、新加坡，嚟香港轉機同停留，都會拜訪我哋，好感激佢，佢通常食加大，兩碗都食得晒，可能英國冇乜呢啲拉麵。」
更多精采時尚內容，盡在 http://add.appledaily.com。