曾經喺民主黨涂謹申主持立法會《逃犯條例》修例法案委員會時，手持「這個不是會議！」標語「抗爭」嘅新民黨容海恩，原來佢老公、即係喺葉劉淑儀領軍嘅匯賢智庫擔任政策顧問嘅袁彌昌（圖）同佢唱反調。唔單止之前13萬人上街反送中惡法後喺facebook貼文指香港再覺醒，袁彌昌仲撰文甚至出席論壇講解惡法嘅影響。
八方問過袁彌昌，佢話呢個惡法風波係特首林鄭月娥硬推下失誤所致，本來可以好快速處理台灣殺人案，硬推下卻迅速反彈變成國際事件，自言係半個建制派嘅佢直指修例冇急切性，擔心影響香港喺國際上嘅特殊位置，甚至影響中國金融發展，認為港府應暫緩修例，警告惡法若過關，對香港影響深遠，「甚至返唔到轉頭」。
嘩，同老婆意見相反，會唔會嗌交？袁彌昌只係話尊重太太政見，如有需要可以畀意見佢㖭，又話葉劉對佢嘅立場都冇意見。同床異夢有乜感受？唔少網民最關注呢點，唔知袁彌昌有乜意見？