身價5,000萬鎊（約5億港元）又如何？效力曼城嘅英格蘭中堅史東斯，喺周四歐國聯四強，代表英格蘭出戰荷蘭嘅表現嚇死人。先開紀錄嘅英格蘭喺下半場被扳平，進入加時再失兩球以1:3落敗，三個失球史東斯要負上唔同程度嘅責任。
歐聯決賽分子七位嚟自利物浦及熱刺球員，今場全部冇為英格蘭正選上陣。英軍喺32分鐘由拉舒福特射入12碼先開紀錄。到73分鐘，荷蘭由馬菲斯迪歷特接應角球頂入1:1，俾佢擺脫嘅球員正正係史東斯，盯人不力累球隊失波。比賽進入加時，史東斯犯嘅錯更令人側目。97分鐘，史東斯喺禁區頂接應回傳玩高章轉身扭波，一記轉身俾荷蘭前鋒迪比搶走個波，後者射門雖然俾比克福特撲出，不過荷蘭嘅昆斯普美斯補射反超前2:1。到114分鐘，史東斯又嚟料，後防右路好揀唔揀傳畀禁區頂嘅中場巴克里，巴克里接波嗰陣已受到普美斯嘅逼搶，佢緊急回傳誤傳畀禁區內嘅迪比，迪比再橫傳普美斯射入空門，奠定3:1勝局。荷蘭入決賽將喺下周日對葡萄牙，英格蘭就只能喺同日同瑞士進行季軍戰。
修夫基賽後撐：攰啫!
後防表現慘不忍睹，難為英格蘭領隊修夫基賽後仲夠膽撐班球員：「我哋喺今場出現太多失誤，部份係源自對手嘅施壓，但更多係我哋自己犯錯，尤其係最後兩個失波。不過我仍然要全力支持史東斯，班球員盡全力比賽，失波佢哋都好痛苦，好難接受。」修夫基亦會堅持多控球在腳嘅風格：「後場控傳風格唔會變，如果我哋放棄就唔會打到呢個階段。我哋唔係因為戰術風格而輸波，只係執行上同埋球員疲勞嘅問題搞到咁。」
