為催谷星期日反送中惡法遊行人數，自然要盡地一煲。民主黨黃碧雲就同八方講，今朝11點會先喺黃埔舉行集氣大會，之後再去晒港九新界五大立會選區開街站做宣傳，務求遍地開花。
最後衝刺 街站遍地開花
民主派今次仲使出新招動員，唔畀建制派專美，出動旅遊巴免費接送街坊去遊行，但就講明係「三無」，即係冇飯盒、冇津貼，同冇限制接受邊啲傳媒訪問，民主黨、民協同部份地區組織都有類似安排，仲已經向緊街坊宣傳，提醒佢哋要報名留位，大家係咪又多個理由上街先？
議會陣線立法會議員區諾軒亦話畀八方知，已經同一班早前發起校友聯署嘅朋友夾定，喺星期六最後衝刺，到時全港唔同時間、唔同地方、唔同位置都會開街站宣傳，「有人咁提議，又覺得幾好，暫時唔知（街站）總數幾多，但應該唔少」，而佢同團隊就會負責最少四個街站，分別喺香港仔、石塘嘴、炮台山同鯉景灣。