今日係端午節假期，亦係6.9反送中惡法遊行倒數兩天，大家都把握機會總動員，喺全港落區做宣傳，呼籲市民周日一齊上街，有啲手法仲幾新穎。好似一班單車愛好者自發搞巡遊，約定今日下晝3點喺北角碼頭出發再踩去金鐘政總，動員市民6.9上街，而被DQ嘅立法會前議員姚松炎，南區區議員司馬文亦會參加。八方見到佢哋已經整定直幡綁車尾，上面嘅口號係「感動市民 69遊行」，實行要對香港人動之以情。
雖然呢條單車巡遊宣傳路線全程只得五公里左右，但就會經過唔少人流密集地方，加上係假期，相信可以接觸到唔少市民。姚松炎就話，到時單車隊會邊踩邊做廣播，甚至會停低做街站，而目的只有一個，就係呼籲大家9號要出嚟上街，一齊抗議政府一意孤行，爭取要求全面撤回修例。
胡志偉明日巡迴九西
如果大家唔方便帶單車過海，其實九龍區聽日都會有另一場單車巡遊，民主黨胡志偉亦會參加。巡遊下晝1點喺尖沙嘴碼頭近鐘樓集合，再經大埔道、欽州街、長沙灣道等人流密集街道，踩去深水埗西九龍中心做終點，同樣歡迎一眾單車友參與。
李八方