中午飯局，外匯M帶來一位新面孔，係佢嘅朋友R，大家傾起上嚟：同是金融界人士，不過我哋係過氣嘅，朋友R係當打嘅，佢之退休老闆就是我們的同輩，外匯M與退休老闆尤其相熟。
朋友R話：「今晚上深圳玩，大家有冇興趣一齊去？」去深圳夜遊，非吾等一杯茶，點會去吖！朋友R顯然係新一輩人物，上深圳見客以及唱K之類，視作等閒，佢話去大陸去得多，知道內地監控商業活動愈來愈嚴，若非有特殊渠道，等閒人等有好多事唔好沾手，譬如佢在北京有一位朋友托佢搵香港專家為一件古董估價，專家睇完資料，同佢講：「三千萬港元，有高冇低，有貨即可轉手。」朋友R話：「件貨在北京。」專家立即改口：「價值即時變成一蚊唔值，你有辦法運來香港至好講！」朋友R話：「點運呀？拉到可能判七年以上監禁，他日人在香港就會被送中！」
這就是問題所在，內地監控人運、貨運得咁鬼嚴密，有人臉識別系統配合手機支付系統及監聽系統，14億人全受監控，偷運古董出境喎，死梗！中國人不重視私隱，中央大力鼓勵「科技創新」，阿里巴巴、騰訊就充分合作，發展支付寶、微信支付，買一部手機，有實名及身份證明註冊，於是民眾以為方便，用手機購物，搭的士，發短訊，一舉一動，皆受監控，無所遁形。睇荷里活間諜電影，傻女逃亡時周圍碌信用咭（因無現金），一碌就被敵人追蹤而至。現在中國仲快，一用支付寶（唔用唔得，因商場不收現金）就實時暴露行蹤。最近有朋友在東莞某地截唔到的士，用微信叫的士，即時搵到，但有附帶條件：「為保乘客與司機無衝突，請你授權許可在的士內的交談，全被錄音。」哦，唔授權就冇的士，梗係授權啦！於是上咗的士，與同行一句話都唔敢出聲！今日中國監控全世界第一，有臉控、聲控，行蹤控，朱元璋、劉伯溫生在今日點會有法子利用月餅傳送中秋起義訊息！美國對付華為之後，CNBC報導，下一個目標可能係制裁全世界最大監控器製造商Hikvision（海康威視）（杭州公司，主要股東係央企中國電子科技集團），如果真係禁制，理由係海康威視協助監控三百萬新疆維吾爾族人，違反人權！倘若CNBC消息成為事實，中美貿易戰更趨激烈，演變成科技冷戰，股市五窮之後恐怕進入六絕！