鄭月娥6430當日見記者，神情閃縮，雙眼尤其虛怯，射來射去頻密狂眨。這種睜眼講大話的身體語言，呃到她自己，呃唔到鏡頭。無怪乎送中三人組不肯與法律界和新聞界會面「開導」這兩批「唔了解法案」的專業人士。講大話只可以在立法會，由建制和梁君彥護駕做義和拳，向泛民下封殺令，easy。送中三人組明知義和拳只懂蠻力，冇實力，愈辯只會愈黑，當眾出糗自不待言。鄭月娥在這個六月，春夏之交，雙眼肯定會再失控狂眨N次，大話愈講愈密，管治愈管愈亂。唯一的「功績」，恐怕就是比前任更快齊集市民的共識：「唔死都冇用，下台！」
鄭月娥一直說，睇唔到市民有乜憂慮，聽唔到歐盟28國「外交照會」有乜實質建議，感覺唔到有撤回送中條例的空間。六月九號，無論多少市民行出來，鄭月娥預咗還拖，黑面回應：「我睇唔到對我嘅人身攻擊，對香港有乜好處，我做市民出氣袋都唔係第一次。泛民去外國教人對付我，我都冇傷肝喎。」鄭氏冷酷示範好打得，將香港打殘送終，眼都唔眨， 跟手打埋齋！香港人，真係咁抵死？活該被釘蓋？69，見真章！