端午節前夕，我在家中重溫《楚辭》，念到「既莫足與為美政兮，吾將從彭咸之所居」時，身後忽傳來一把久違的聲音：「你帶我去搵湯家驊！」轉身一看，只見一彪形大漢手握西瓜刀，目露兇光地望着我。我呆了半晌：「閣下係……」他說：「我三年前咪見過你囉。」
我猛然大悟，立刻起來跟他握手：「屈靈均先生，好耐冇見！」（上次見面詳情，請參考三年前專欄〈老屈屈原〉）他也不好意思板起臉孔，微笑答道：「唔使咁拘謹，叫我Lincoln啦。」然後正色道：「講咗重要嘢先，前幾日我嘅後援會會長賈誼發咗段新聞畀我睇，話湯家驊抽我水，呢條友講：六四係要悼念死難者，唔係仇恨共產黨，正如端午節係要懷念屈原，而唔係仇恨楚頃襄王。有冇件咁嘅事？」我說有。
Lincoln爆了一句四字成語後，繼續說：「係人都知，端午節早就唔係用嚟紀念我啦，依家係要嚟放假同賣糭㗎嘛。再講，我係自殺，六四係學生畀人殺，關乜事呀？楚國亡咗二千幾年，頃襄王投咗胎四十幾次，正常人都唔會仇楚啦！但六四殺人犯仲生勾勾喺度，點解唔使追究責任？你哋嗰條八婆，呢排咪好鍾意話幫死者討公道嘅，又唔見佢為六四受害人做嘢？湯家驊又做乜支持修訂逃犯條例呀？紀念一下死者咪得囉，使乜引渡呀？為咗追究責任，搞到各國抗議，無助香港發展㗎喎──喂，有冇水？鬧到口乾。」
我很詫異他這麼熟悉香港時事。他長歎一聲，說：「因為我喺今日香港，睇到當年楚國嘅影子。司馬遷話我曾經同楚懷王講：『秦，虎狼之國，不可信。』其實唔係，咁講係侮辱咗虎狼。當日我係話：『虎狼猶可信，而秦不可信。』楚國嘅最大敵人根本唔係秦，係賣楚賊，例如放走張儀嘅人渣靳尚，仲有死八婆鄭袖。唉，你知唔知我自殺前對住個天講咗乜嘢？」
我搖頭。Lincoln囑我抄下來：「我感到憂慮的，不是楚國的自主權會被秦國剝奪，而是這項權利會一點一滴地斷送在楚國某些人手裏。」