同來自三藩市嘅生物科技投資專家A傾偈之後，估唔到第二日又碰到一位世姪I，佢與一班人一齊，人人着得整齊，只有佢一位穿着T恤，老闆身份象徵也。記得二十年前科網股狂潮之時，李澤楷在香港開風氣之先，穿着啡色長褲，加一件藍恤衫，唔打呔，配一件海水藍上衣，香港不少ｉ乜ｉ物嘅公司創辦人紛紛仿效矽谷風格，一位已發達嘅老友記當年對左丁山講：「乜你仲着西裝？肯定唔係老闆階級！」
到後來，喬布斯做新產品演述會，永遠着一條半舊牛仔褲，現在科技公司，初創公司老細，有邊個會着到銀行家咁整齊呀？（按：fb上市之前，朱克伯格到JP摩根大通，投資銀行部主管下令部門人員穿上與朱克伯格匹配之服裝，即T恤、卡其褲，銀行家現時之衣着要求已經大大放寬。）
左丁山一眼就從衣着認出一位年青I先生係老闆，覺得佢樣子好相熟，但唔記得佢叫乜名，後來佢講：「我阿爸同埋你在劉遵義府食過飯㗎嘞，我都喺度！」一言驚醒夢中人，佢就係世姪I，普林斯頓經濟系畢業，對沖基金經理，對中國歷史滾瓜爛熟，左丁山唔夠佢講，特別安排佢同肥仔K到上海總會吃晚飯，等佢哋講歷史故事講足一晚，後來世姪I亦特別到中大修讀咗一個比較歷史碩士學位。
現在世姪I搞邊科呢？佢話：「唔做對沖基金咯，炒股好難，2017年賺到笑，2018年輸番有突，2019年都係有波幅冇升幅，特朗普Twitter玩殘股市，十年前有二十幾位朋友入呢行，依家剩番三位仍然在對沖基金。我現在專注投資生物科技公司，在Nasdaq上市。」咁快上市？P/E股價如何？世姪I話：「搞生物科技唔計呢啲古老數字嘅，公司現在收入微薄，利潤係零，股價市值係四億美金！」唔怪得係新經濟，新到左丁山呢類「前輩」無法理解，收入低，利潤零嘅公司股票都有人追捧，咁公司投資甚麼科技？世姪I話：「我哋公司同香港大學、中文大學醫學院有合作，將一啲成熟科研項目商業化，推出市場。譬如同港大袁教授高教授發展非抗生素的抗病藥，可以殺死不少惡菌，因為抗生素長期濫用，已開始部份失靈，港大研究出來嘅新產品，將來肯定大有希望！」果然後生可畏，站在投資潮流尖端，左丁山一輩應受淘汰。