曼聯今季英超只得第六，下季冇得踢歐聯，紅魔球迷個個都對今季成績搖頭嘆息，部份甚至對家陣領軍嘅蘇斯克查唔抱太大希望。既然魔迷唔太滿意蘇B，家陣教緊墨西哥甲組球隊多拉多斯嘅阿根廷球王馬勒當拿，就乘機自薦，話自己先係教紅魔嘅最佳人選。我求大俠聽完之後當堂嚇一跳，然後得啖笑，唔通仲嫌曼聯唔夠衰？
老馬領軍CV差到爆
老馬最近接受足球權威雜誌《442》專訪，估唔到竟然口出狂言：「如果曼聯需要一位主帥，嗰個人就係我喇！我知道佢哋喺全球賣咗好多衫，但佢哋要贏到錦標先得㗎！我就可以幫佢哋做到呢樣嘢。」佢之後仲繼續吹，話曼聯曾經長期係佢最愛嘅英格蘭球隊，但家陣已經轉咗曼城，原因係佢個前女婿阿古路踢緊曼城，自己就一直覺得呢位後輩實在太勁；後尾又話自己最鍾意嘅曼聯球員，就係季後已落實會離隊嘅安達靴里拉，對於受到魔迷指摘表現唔出身價嘅保羅普巴，佢就話覺得對方唔夠勤力，呢幾句又好似幾啱一班魔迷聽！
人有自信係好事，但佢話自己可以拯救曼聯出苦海，似乎真係唔太知個醜字點寫，完全冇諗過自己教波差到咁，何德何能教曼聯。大家對佢印象最深刻，可能就係佢教阿根廷國家隊踢2010年世盃嗰陣，喺8強0:4慘敗畀德國，佢之後教每隊波都唔教得長，上年開始帶領墨甲嘅多拉多斯，雖然連續兩季都離升班好近，但兩次都冇成功，所以不如等佢帶到多拉多斯上墨超先再算喇！不過，我諗就算好似前領隊雲高爾所講，執行副主席活華特真係唔識波，但相信都唔會癲到去請老馬嚟教曼聯，如果係咁，紅魔真係分分鐘準備降班。
蘇B想搵賀拿頂渣古
聽老馬唔負責任咁是但噏完，英國傳媒另一邊廂報道，話曼聯留意緊法蘭克福前鋒施巴斯坦賀拿，準備以佢作為盧卡古離隊後嘅代替品。國際米蘭有意向盧卡古招手，但曼聯堅持要8,000萬鎊（約8億港元）先肯放呢位比利時中鋒，雖然唔知國際出唔出到呢個價，但活華特已經話畀蘇B聽，只有賣走盧卡古，先可以簽賀拿入魔。