【銅鑼灣】王敏德與馬詩慧結婚多年，兩人育有兩女一子，兩個囡囡王曼喜與王麗嘉（Irisa）似足父母身材高䠷，Irisa早前更在Ig貼出浴裸照賀24歲生日，引起全城熱話。雖然女兒作風大膽，但王敏德夫婦依然視女兒為掌上明珠，尤其馬詩慧與女兒更加感情好，經常孖住行街。
日前大約傍晚6時半，《蘋果》在銅鑼灣時代廣場附近發現馬詩慧與次女Irisa行街掃貨，身高5呎11吋的Irisa大騷長腿，甚為吸睛。當時Irisa拿着一個購物袋，尾隨媽咪身後，二人步行到鵝頸橋底街市附近的商舖。馬詩慧表現有點心急，急步去到一間麵包店門前，之後有一名四眼男上前問馬詩慧，原來對方想跟Irisa合照，馬詩慧就一口代女答允。
急急腳揀水果
馬詩慧與Irisa母女入到麵包店，馬詩慧立即去揀麵包，囡囡就全程都站在一旁玩電話，馬詩慧很快便夾了幾個麵包，走到收銀處負責付錢，而Irisa則在櫃台揀了一袋糕點，更即刻開袋進食，之後就遞給媽咪，而馬詩慧也好自動將糕點擺入肩上的環保袋。
跟着馬詩慧再以極速mode，帶Irisa走到一間超市，急急腳去揀水果，也不忘與Irisa閒聊，而Irisa大部份時間都是懶人mode，行行企企或玩電話，之後跟住媽咪去收銀處，最後繼續由馬詩慧負責埋單，她再將水果擺入環保袋中，二人就走回銅鑼灣方向，估計搭車返家。
採訪、攝影：朱志聰、黃曉程
