一向敢言的香港藝術家程展緯早前趁林鄭出席《明報》酒會，同另一位藝術家黃宇軒向林鄭高舉「撤回惡法」標語抗議後，最近更為6.9反送中大遊行，創作咗一批啜核嘅示威道具。
佢其中一個作品係寫上「亂拋垃圾 人見人憎」八字，再附上一對港人熟悉嘅「鄭若驊式白眼」嘅標語（圖）。程展緯話，鄭若驊早前面對傳媒提問時，反白眼嘅形象深入民心，批評佢過去不單冇喺修例上守護香港法治，面對巿民同傳媒時亦高傲，更連利益申報亦冇做足，直斥：「佢（鄭若驊）一直都人見人憎㗎啦！」
藝術家寸林鄭活喺自己世界
另一件作品就見到林鄭自己一人企喺個Disco波上面。程展緯話，因為林鄭過去一直只活喺自己世界入面，對於民主派議員、外國領事、大律師公會對送中條例嘅質疑，林鄭唔係話人誤解，就係話人講廢話，又拒絕對話，令佢諗起《小王子》故事中，一個人活喺星球上的情景。程展緯話，會考慮喺遊行中分派呢啲示威道具畀巿民，佢最希望就係多啲香港人參加反送中遊行，「因為唔知將來仲有幾多呢種機會」。