名人向傳媒發律師信時有所聞，例子有國家領導人689曾多次對《蘋果》出手，但倒轉由傳媒向讀者出律師信要求對方澄清，八方都係第一次聽。公民黨前主席、資深大律師余若薇噚日喺fb公告，收到由《文匯報》同《大公報》委託發出嘅律師信，話佢上月喺fb專頁轉載送中惡法新聞時，錯誤引述佢哋嘅資料，有誤導公眾之嫌，仲會「引來公眾不必要的恐慌」，故表示「強烈不滿和遺憾」，仲要余大狀收信後立即喺fb澄清同道歉。
反擊政府強行修例仲恐慌
大公文匯傳媒集團有限公司封律師信入面話，佢哋冇講四種情況都會移交內地，而係話情況三、即係港人在港觸犯涉及危害國家安全罪，同埋情況四、即係中國公民或外國人在國外針對中國國家或公民犯罪而身在香港，「一般也不會出現被移交內地的結果」。但余若薇覆畀佢地嘅律師信就完美KO對手，話理解「一般也不會出現」意思係即使不常出現，但都係會出現，八方咁睇，余大狀講法冇錯！
八方睇番當日篇帖文，覺得佢其實好無辜，因為當時余大狀只係轉載《蘋果》製圖，然後加留言：「都話逃犯條例犀利過23條 危害國家安全罪行移交內地審？」《蘋果》張圖由《文匯報》、《大公報》當時篇「權威人士解讀韓正講話」報道中原文照錄，究竟錯啲乜？
企喺道理一方嘅余若薇當然唔跪低，轉頭已上載咗回信，自謙話「小小一個帖文何德何能」，不敢當「引來公眾不必要的恐慌」嘅指控，繼而仲叫對方轉告客戶，即係《文匯報》同《大公報》，認為政府強行修例，「一下子炸開的恐慌威力驚人」。
被《文匯報》及《大公報》委以重任嘅林李黎律師事務所，合夥人之一，就係曾經公開稱讚共產黨，後來被罷免嘅香港律師會前會長林新強，網民留言話余若薇咁快覆，可能搞到人哋律師樓要OT囉。
李八方