香港之前就有一位弱視球迷，喺入場睇和富大埔對航源嘅亞協盃分組賽嗰陣，因為用望遠鏡同哄埋部手機嚟睇波，俾其他球迷誤會佢係賭波集團成員，仲驚動警方介入，搞到呢位視障球迷相當冇癮。
香港弱視球迷險被拉
同香港呢位弱視球迷一樣咁鍾意足球嘅大有人在，遠在西班牙華倫西亞，有一位叫阿柏利斯奧嘅華倫死忠更加誇張。佢喺40年前已經盲咗，不過由1994年一直買華倫季票，坐同一個位，每場波都風雨不改咁去到馬斯泰拿球場支持華倫，直到兩年前過身。呢個咁感人嘅故事得到球會回應，決定向阿柏利斯奧作最高致敬，將佢坐開個位改成1:1嘅銅像，往後每一場波，阿柏利斯奧都可以繼續支持華倫。
阿柏利斯奧兩年前已經過身，呢位盲人老球迷喺50年代已經因為視網膜脫落而盲咗，不過睇唔到嘢唔代表唔可以支持球隊，馬斯泰拿球場就係佢另一個家，由94年開始，每一場華倫嘅主場賽事，佢都會手持季票入場感受氣氛，直至死之前，呢個習慣都係冇變，可見佢係幾咁忠實嘅華倫躉。
今年係華倫創會100周年，會方嘅慶祝活動之一，就係紀念呢位死忠球迷，將阿柏利斯奧坐開個位，即係中央看台第164段第15行最側邊個位，改成佢嘅1:1銅像，從此呢個位就係阿柏利斯奧專用座，永遠留喺馬斯泰拿球場，同埋最緊要係，等佢以後每一場波都可以陪住球隊。
阿仔：先父實好開心
近日有條紀錄片，就係阿柏利斯奧個仔，帶埋老竇戴開嘅華倫頸巾去到球場，自豪咁坐喺銅像側邊，陪住老竇睇波。佢回憶話：「93年華倫對卡爾斯魯厄嘅賽事，係佢最後一次喺電視度睇華倫嘅主場波，由嗰日開始，佢每一場都去到馬斯泰拿，感受賽事同埋感受呢間球會，佢非常享受呢種氣氛，我就會喺佢身邊同佢講場上發生緊乜嘢事。2004年（華倫贏得西甲同歐洲足協盃），就係我爸爸人生最開心嘅一年。如果爸爸知道，華倫嘅百年會慶，有預埋佢嘅慶祝活動，我知道佢會開心到不得了。」