聽完生物科技投資專家A講在中美貿易戰環境下，華裔科學家及投資基金相當「重視」，任何來自中國大陸專家及資金都會有「正規招呼」，再無幾年前咁寬鬆。
世情如此，我地小人物點會有辦法改變吖，唯有重整自己嘅行為以適應之。左丁山順便問吓佢對中藥治血壓嘅做法，專家A話：「我唔敢話得，亦唔夠膽話唔得，以前請教過權威教授簡悅威，佢話廿四味涼茶有廿四種藥材，每一樣都可以做化學檢驗其藥性及特質，但將廿四味用五碗水煲成一碗之後，嗰一碗藥茶究竟係乜冬冬？西方科學仍然難以精確解釋。」咁樣講，只好引用鄧小平金句：「實踐是檢驗真理的唯一標準，黑貓白貓，能捉到老鼠的就是好貓」！大姐大話朋友聽馬來西亞中醫方法服用之後，好有功效，咁就當嗰張中藥方有效用啦。
香港要發展生物科技，係特首林鄭月娥大力鼓吹嘅，故此港交所全面配合，迎合特首要求。有投資銀行家對左丁山講，普通IPO，要得到港交所批准，過程往往係至少六個月，但如果生物科技有關嘅公司要上市，港交所會盡量大開方便之門，盡力配合，三個月至六個月就可以批准上市！
有此背景，左丁山向專家A講：「盡快搵生物科技公司來港上市啦，賺番一筆都好。」專家A答：「冇咁易，我地香港人慣咗依足規矩，我移民美國後，更瞭解美國對上市公司作不盡不實聲明之嚴厲懲罰，生物科技呢家嘢，要好多年先至知道究竟有無成果。好多時做咗十年，到最後一步竟然會功敗垂成。港交所有甚麼專家去vet上市生科股，我唔知，如果唔係好嚴謹，投資者好易中招。我從來認為散戶唔應該炒作生科股，有好多自稱新藥，值得懷疑㗎！」
專家A都幾老實，生物科技並非人人懂得，愈複雜，愈不要沾手，你估樣樣生物科技成果都好似T-Test咁易明白嘅咩。香港孕婦都知道懷孕後就要做一個T-Test，發明人盧煜明教授如果搞上市，港交所必定歡迎！最近新加坡副總理王瑞杰於五月二十八日率隊到中大訪問，就聽過盧煜明教授及其他中大教授演講科技研究，聽聞對盧教授幾有興趣。生物科技之效用，據專家A講，過去三十年，真正成功嘅機率係一半半或以下，真材實料如T-test，迅速為市場接受者，係比較少見！