馬會噚日公佈申請做馬主攪珠中籤名單，最令人意外係小小超李澤楷中籤，可以喺7月1日至明年12月31日引入一匹自購馬，即係曾喺外地出過賽嘅馬匹。今年有254份申請，自購馬名額只有150個，平均1.69人爭一個位，唔通小小超同前港姐季軍郭嘉文蜜運，連帶抽籤都有好運？
超人八十年代贏過頭馬
小小超過去好少喺馬場露面，今年4月28日佢旗下保險公司喺沙田馬場搞盃賽，佢以贊助商老闆身份頒獎，仲公開郭嘉文嘅女友身份，兩人高調拍住拖入場，今次中籤做馬主，兩口子以後可以拍住拖入場睇馬仔喇！
小小超第一次做馬主，爸爸李超人以前就養過幾匹馬，分別係「信心」、「金榜題名」同「三甲」，三甲贏過兩場頭馬，不過此駒1983年退役後，李氏家族都冇再喺香港養馬，估唔到相隔36年，再次踏足香港馬圈。