近期中國國家隊用歸化兵嘅新聞就成為熱話，繼之前出身自阿仙奴青訓營、有華人血統嘅李可入選國足，成為歸化第一人後，其餘被中國足協列為歸化兵考察名單嘅外援，入籍程序都係進行當中。而巴西傳媒就報道，兩位巴西前鋒高拉特同艾傑臣初步同意入籍中國，後者亦已通過入藉條件，最快今年內可以代表中國隊。相反，高拉特就要喺中國住多半年，先可以滿足居住滿五年嘅轉籍條件。