雖然歐洲主流聯賽就告一段落，不過美職聯戰火就繼續。其中就「戰神」伊巴謙莫域在陣嘅洛杉磯銀河，禮拜日喺主場迎戰新英倫革命。年屆37歲嘅伊巴喺場上風采依舊不減，呢位瑞典前國腳84分鐘喺禁區內接應隊友傳送心口控定，再右腳一挑，繼而竟出動倒掛入波，成個動作流暢而且精采，真係令人要一睇再睇。可惜，銀河今場要輸1:2，不過仍然喺西岸排第二，九分落後FC洛杉磯。