今年27歲嘅何艷娟（Katherine）都算傳奇，14年當選港姐季軍後，工作一直唔多，但去年忽然升呢做咗67歲澳博營運總裁吳志誠老婆，不過爺孫戀唔夠一年就玩完，佢再被爆同55歲擁逾200億身家嘅陳燿璋（Anson）舞池攬啜。
觀音兵跟身
日前《蘋果》收到讀者梁先生爆料，提供3張聲稱係何艷娟17、18歲喺英國讀書時期嘅學生相，相中人同何艷娟有八成相似，但單眼皮，臉圓圓，而且鼻樑冇𠵱家咁高咁直。梁先生話：「張相係2008年6月喺英國影嘅，嗰時佢（何艷娟）住學校宿舍，佢一直都好唔鍾意自己嘅超級單眼皮，仲有個鼻唔夠高，成日睇住范冰冰啲相。放完暑假9月飛返英國，就變咗雙眼皮，有冇整容我唔知，但個鼻真係比以前高咗，可能係化妝效果或P圖啦！」
另外兩張相係學校運動日，梁先生話：「佢以前英文名叫Katie，平時都有幾個華人觀音兵埋身，但個個正正常常着件運動衫，係佢就摺低條運動褲，露吓腰騷啲肉出嚟，派軍糧畀佢啲兵。」梁先生表示曾聽過何艷娟自取外籍女同學嘅化妝品，操行麻麻，但讀書成績不俗。《蘋果》曾以短訊搵過何艷娟，問佢有冇整容，還是化妝技巧令自己變靚？但截稿前冇回覆。
其實睇何艷娟一啲舊照，的確女大十八變，五官越大越精緻，13年讀緊港大法律系嘅佢參加《FACE》周刊舉行嘅UStar大專校花校草大選，當時已經有好深嘅雙眼皮，但圓圓嘅臉蛋同𠵱家嘅瓜子臉有好大分別。
撰文：馮仁昭