再有球星捲入強姦醜聞！上周傳媒廣泛報道，話從巴西警方嘅文件發現，效力法甲巴黎聖日耳門（PSG）、正喺家鄉備戰今夏美洲國家盃嘅巴西球星尼馬，被指上個月喺巴黎涉嫌強姦一名女子。事件曝光後尼馬立即拍片否認，佢老竇甚至話尼馬係俾人設局勒索！
受害人返巴西報案
尼馬下半季喺PSG傷多過踢，先係目送球隊喺歐聯意外輸畀曼聯出局，復出後又喺四月尾嘅法足盃決賽輸波，尼馬仲要打球迷被罰停賽，或多或少影響咗佢嘅心情。傳媒引述巴西警方文件內容，有一名女性指控尼馬喺上月15號夜晚8點左右，喺巴黎一間酒店內將佢強姦，最終呢位女士喺上個禮拜五向巴西聖保羅警方報案。
呢名女子又同警方透露，佢同尼馬喺ig互傳訊息後，尼馬邀請佢飛到巴黎見面。佢話一名叫Gallo嘅尼馬代表，負責幫佢預訂去巴黎嘅機票，同代為安排酒店住宿。又話當佢見到尼馬到酒店嗰陣已經飲醉晒，初時佢哋仲有互相撫摸，但尼馬後來突然變得粗暴，仲用埋暴力違背女方意願將佢強姦。巴西警方嘅報告仲話，女方因為太過驚所以冇即時報警，事發兩日後仲離開咗巴黎，直到上禮拜五先同巴西警方報案，所以巴黎警方嗰邊係完全唔知情。
七分鐘片否認指控
事件曝光後，尼馬立即自拍咗段長達七分鐘嘅片放上網，否認有關指控：「我俾人話我強姦，呢個係一個好嚴重嘅指控，識我嘅人都知我份人，永遠都唔會做出呢種事。」尼馬嘅老竇亦喺巴西電視節目為囝囝辯護，話尼馬同女方係大家同意下先上床，但女方嘅律師喺兩人分手後就勒索尼馬：「呢個係艱難嘅時刻，但如果我哋唔盡快揭穿真相，雪球就會越滾越大。」佢仲話手上有尼馬俾人勒索嘅證據，當中仲有證人同相，尼馬已經準備好為自己辯護咁話。
目前兩方面各執一詞，雖然唔知最終結果係點，不過近年都有唔少體壇巨星，好似基斯坦奴朗拿度（C朗）、羅賓奴、尹佩斯、拜恩等俾人告強姦，但好多最後都冇事，唔少係用錢就解決咗件事。