沙田瀝源邨老字號麵店「盛記麵家」，噚日搞咗個「撐記者．食碗麵」義賣行動，上午9點至下午3點嘅所有收入，都會捐畀網媒「眾新聞」。老闆B哥話，舖頭每年都有一次義賣日，今年因自己最尊重記者，尤其最敬重曾經遇襲嘅《明報》前總編劉進圖，大讚佢有份創辦嘅「眾新聞」報道不偏不倚，所以決定幫佢哋籌錢。B哥唔只出錢又出力，仲借埋舖頭天井出嚟，畀義工搞義賣，係咁多年嚟第一次。
1,500人幫襯 生意額逾30萬
噚日好多街坊支持㗎，坐滿成間舖，門口排晒長龍，仲有唔少政界同新聞界人物現身，包括公民黨楊岳橋、記協前主席岑倚蘭、同前立法局主席黃宏發等等。八方問咗AY，佢大讚盛記出品好味道，有麵食又可以支持記者，所以朝早做完街站就即刻叫埋成班好友撐場。佢哋食麵之餘仲買咗唔少義賣小食。
到下晝3點埋單計數，有接近1,500人幫襯，生意額超過30萬。不過B哥話，籌到幾多錢其實都係小事，自己只係略盡綿力，最緊要係透過今次義賣，令香港人關注新聞界嘅困境，明白記者工作辛酸，希望大眾以後繼續支持新聞界嘅運作呀。
李八方
