影圈四大惡人之一李兆基肝癌擴散病逝

影圈四大惡人之一
李兆基肝癌擴散病逝

資深演員李兆基,在影圈中多飾演惡人而為人認識,與黃光亮、成奎安、何家駒並列為「香港影圈四大惡人」。惟他近年兩度中風而淡出影圈,昨日傳來噩耗,基哥因肝癌擴散至肺部,經搶救後無效在伊利沙伯醫院病逝,終年69歲。

【1949-2019】
李兆基昨日因肝癌擴散至肺部,經搶救後無效在伊利沙伯醫院病逝,終年69歲。

親人陪伴在旁

基哥好友陳慎芝昨日接受《蘋果》電話訪問時證實消息,他透露基哥在一星期前入院,離開時家人包括太太、姊姊、弟弟都在場陪伴。陳慎芝說:「我去探過佢兩次,一直昏迷,都知今次唔得。但我嗌佢都有開眼望一望我,我都同佢講:『要走就係要走,返唔到轉頭,就唔好咁辛苦。』咁起碼佢呢40年都係一個好人,唔再係道友、唔係壞人。」他稱基哥近年加入教會,但未有正式受洗,暫時未知其家人決定會用甚麼儀式舉殯。今年2月《蘋果》發現基哥與女伴入紙結婚,陳慎芝當時受訪承認為基哥安排結婚,又透露基哥身體狀況:「頭腦清醒,但身體好弱。」

李兆基去年曾中風,出院後與祥嫂和黃夏蕙茶聚時,要靠枴杖行動。

今年3月李兆基與邱巧貞結婚,並由好友陳慎芝作見證。

李兆基與吳志雄參演的《黑獄斷腸歌之砌生豬肉》,被視為經典。

基哥另一生前好友吳志雄說:「希望佢一路走好,大家節哀順變,因為佢揹住個病痛苦,走得快越好,天堂等緊佢,天堂冇痛苦。」90年代「四大惡人」只剩下黃光亮,對於李兆基離世,他在電話中說:「打晒嚟嘞,冇回應呀。」然後便匆匆掛線。演藝人協會主席古天樂回覆《蘋果》說:「兩天前已收到電話知道佢情況好差,已經有心理準備,我會同佢家人保持聯絡看他們有乜需要,我會盡力提供一切幫助,希望基哥一路好走!」周潤發太太陳薈蓮表示:「認識基哥好多年,發哥也一齊和他合作了好幾部電影,雖然最近幾年沒有機會合作,但偶然會在九龍城的茶餐廳遇上,會聊聊天。沒有想到今天聽到基哥離開的消息,真的非常惋惜!」

吹水基成經典

人稱「基哥」的李兆基,曾是「慈雲山十三太保」成員之一,當年他被已故導演林嶺東發掘當上演員,拍過40多部電影。基哥在電影中經常演出黑幫角色,最為人熟悉的是《古惑仔》電影系列內的「吹水基」,此外,基哥亦曾參演周星馳電影《食神》、《喜劇之王》、《算死草》及《行運一條龍》等。基哥後來更當上監製和編劇,籌劃多部江湖電影,更把「慈雲山十三太保」的過往搬上大螢幕。
採訪:鍾國仁、嵐山