在Rosewood彤福軒吃午飯，外望維港海景，成班老友都係工作多年，享受退休生活之輩，只有左丁山還在捱世界。地產F時不時都鍾意到灣仔街市買海鮮，最近畀佢買到一隻巨蟹，伸直有佢成條手臂咁長（有圖為證㗎），真係嚇親，班老友笑言依家係使緊子女之錢，食靚海上鮮唔使問價錢，因為再過二十年，啲錢就係子女嘅啦。記得有一位朋友之朋友講笑話，講自己個仔唔夠孝順，嬲起嚟話要上天堂前用盡手頭現金三億，唔留斗零畀個仔，點知個仔聽到之後，立即返屋企教老竇：「你發達當然明白錢搵錢，息上息之道理，一個月使一百萬，一年用千二萬，長命百歲，再過三十年就使晒啦？係咪？」老頭子話：「啱，我每個月用晒一百萬。」兒子說：「咁啦，買滙豐銀行股票三百萬股，一年派息每股四元，收息就有千二萬，任你使！」老頭子心念一動，用三億買咗三百萬股滙豐，果然年收股息千二萬，冇法子用得晒（唔賭唔包小三），眨吓眼十幾年，雖則股值已跌咗三成半，兒子仍然唔急，因為再過十幾年，輪到兒子每月花一百萬了（假設滙豐不會削減股息）。
地產F聽完「笑話」之後，話：「咪係囉，一於食靚啲對得住自己。」跟住又問：「中美邊個夠耐性打貿易戰？」睇表面，當然係中國內部團結，口徑一致，全國傳媒統一口徑，全國人民一致支持中央，聽習近平的話，又有傳言話中國人可以捱得食樹皮三年（如在大躍進人民公社期間），而美國人捱不了半個月唔食漢堡包！美國呢，消息一片混亂，特朗普一個人講晒，口風日日不同，時冷時熱，似無定向風。團結方面，全國分化，傳媒唔聽話，成日講領導人壞話，CNN仲唔生性，有意搗蛋，叫記者去中西部訪問農民，一片哀鳴之聲，話貿易戰影響生活，又到緬因州訪問漁民，聽漁民話龍蝦豐收，但大市場中國不來訂單，漁民捱得好辛苦，雖然支持特朗普，但希望貿易戰快啲打完；另一邊廂紐約時報、民主黨猛咁篤總統背脊，當總統權威冇到，甚至霍士新聞竟然訪問民主黨參加競選總統嘅人物，令到特朗普出Twitter大罵霍士搞乜鬼；還有呀，美國商人夠膽寫信畀總統抗議向中國開徵關稅。所有呢啲美國事件，在中國不可能發生，美國傳媒不愛國，反政府，中國傳媒愛國，擁護習主席。中國一片表面平靜，全國統一聲音，商人聽令靠邊站，不會哼半句。睇完兩種截然不同國情，你信邊個會贏貿易戰？左丁山學識膚淺，唔識啦，有機會真係要請教洪清田講解吓混亂中見和諧，平靜中見恐懼嘅道理。