曼聯今季喺英超只係得第六名，下季冇份踢歐聯，領隊蘇斯克查就話會重組球隊，而據英國傳媒報道，蘇B畀咗12個月限期曼聯去大清洗，賣走佢覺得唔需要嘅球員。到底呢張清洗名單有咩人呢？據英國《太陽報》報道，蘇B想曼聯賣走嘅球員最多有成14個，當中會方亦通知咗盧卡古，如果收到合適報價會放佢走。今季完咗之後，安達靴里拉同路爾斯華倫西亞都已經離隊，而達美安同馬高斯盧祖亦好大機會會跟住走人。至於盧卡古，雖然有傳佢係意甲國際米蘭收購名單嘅頭號目標，但因為曼聯兩年前向愛華頓收購佢嘅時候畀咗7,500萬鎊轉會費，加上佢周薪成22萬鎊咁貴，睇怕國際要引入呢位比利時國腳肯定要使好多錢喇。