唔通連個天都唔鍾意佢？啱啱俾巴西足總褫奪隊長臂章嘅尼馬，星期二喺國家隊集訓時疑似因為左膝受傷而提早離場，唔知會唔會影響佢代表國家隊出戰美洲國家盃，爭取表現嘅機會。
懷疑撞傷左腳膝頭
巴西足總喺周一宣佈，尼馬唔會喺下個月嘅美洲國家盃做隊長，話教練堤迪已經同佢溝通過，至於嚟緊兩場對卡塔爾同洪都拉斯嘅友賽仲有美洲盃，都會由尼馬嘅巴黎聖日耳門（PSG）隊友、現年36歲嘅後衞丹尼爾擔任。點知到咗星期二，27歲嘅尼馬就喺國家隊例行操練受傷，喺球場上撳住左腳膝頭，喺呢節操練完成之後，尼馬喺隊醫拉斯馬陪同之下離開球場。據英國《天空體育》報道，27歲嘅尼馬相信係喺操練期間，喺另一位PSG隊友堤亞高施華緊纏之下起腳射門嘅時候受傷。
對經常被批評「插水」嘅尼馬嚟講，近期都算係多事之秋。上個月尾嘅法國足總盃決賽，PSG喺領先2:0嘅優勢下竟然俾雷恩追和2:2，最後互射12碼仲輸埋，五連冠夢碎，尼馬賽後行上台準備領獎嗰陣，同雷恩球迷發生衝突而且出手打到對方，結果俾法國足總判罰停賽三場。
勁傳今夏回歸巴塞
尼馬被指喺PSG過得唔開心，可能佢已經好掛住昔日喺巴塞隆拿嘅日子。或者機會終於嚟到，周二有報道指巴塞隆拿想喺今個夏天搵番尼馬，會將法國前鋒奧士文尼迪比利或者巴西球星菲臘比古天奴作為交易籌碼送去PSG，消息話巴塞更衣室入面唔少大牌球星都好支持呢項交易，當中包括阿根廷球星美斯在內。
西班牙電台RAC1嘅報道話巴塞同PSG已經展開談判，但一切都只係好初步嘅階段，尼馬同一班巴塞舊隊友向來感情唔錯，同蘇亞雷斯、美斯、碧基都經常有聯絡，如果報道屬實，只係離開咗巴塞兩季嘅尼馬可能好快就有機會回歸呢支西甲勁旅。
今次係巴西自1989年之後首次主辦美洲國家盃，佢哋希望能夠喺2007年成為美洲國家盃盟主之後再次贏得重要錦標。今屆美洲盃，巴西會喺6月14日嘅的首場分組鬥玻利維亞，同處A組嘅兩隊分別係委內瑞拉及秘魯。