呢輪朋友聚會，話題總不能離開逃犯條例與中美貿易戰。尖沙咀有超級豪華酒店Rosewood啟業，地產F輪值做東，話要試試新意思，請大家到九龍吃午飯，呢間酒店設於Victoria Dockside（新型寫字樓大廈），以前新世界酒店嘅位置，擁無敵維港海景，但二十幾年前去新世界中心就容易，現在從尖沙咀地鐵站行過去都幾煩氣，起碼十分鐘，成個建築地盤起碼仲有兩三成未完工，有好多保安巡視。左丁山未去過酒店，於是問保安大哥：「請問Rosewood酒店點上去？」保安話：「好易啫，沿汽車斜路行上去就係。」咪照行囉，點知行完斜路還有二十幾級樓梯，唯有頂硬上，以後再嚟，一定要坐的士，過海塞車都係咁話。上到去酒店彤福軒，燈色昏暗，要定一定神先至敢慢慢行，入到私人房間，有個大窗，海景撲面而來，舒服晒，補番氣喘之不足。賓架W近年染上眼疾，佢話入房之前，幾乎仆親，因燈光昏暗也。佢又係行斜路上嚟嘅，我哋就畀泰國R取笑，話唔識行去地面轉電梯，左丁山唯有苦笑。
彤福軒有鄭裕彤與周大福之名，當然唔衰得，賣高級順德菜及粵菜fusion，一開波飲碗牛乳燕窩羹，大家已讚不絕口，反而後來之煎魚頭、煎魚餅、大良炒鮮奶以及片皮鴨等等等，係非常足料好味道，但並非超班水準，例如隻烤鴨好則好矣，如與沙田凱悅中菜廳（沙田18）巔峰時期之烤鴨相比，仍然差少少。器皿就當然超晒班，地產F係識貨之人，一望就知係高級瓷器，叫大家睇睇瓷碟廠名，乃Narumi，日本名牌骨瓷也。地產F又話酒店之精品擺設，十分考究，一定十分昂貴，可見鄭家傾全力打造Rosewood為全港最超級豪華酒店，目前已勝君悅一籌。旁邊之洲際酒店多年未見裝修翻新，漸呈老態，恐怕唔夠競爭力了。
地產F帶來Rose，點知開瓶費要收五百元，唯有從酒水牌揀咗一枝紅酒，我哋並非酒客，冇所謂之至啦。
吃過三巡，地產F出考試題：「左丁山，中美貿易戰打幾耐，點收科？」果然係冇免費午餐，唯有背標準答案：中美貿易戰係綜合國力立體戰，深層原因在於民主資本主義經濟與一黨專政資本主義鬥爭，共產主義不忘初心，就是消滅資本主義！美國民主共和兩黨有極大分歧之處，但對中國之觀感與反應竟無異議，可見美國政壇就是決心不讓共產黨統治的中國超前，在經濟上擊敗美國，令第三世界視中國為偶像，走中國模式。於是呢場鬥爭會延續起碼四五年，睇吓邊個夠耐力囉。