前AC米蘭中場岩布仙尼，周三度過42歲生日就喺ig上載同家人慶祝張相，竟然喺個post嘅文尾寫上「Happy Birthday To Me！」，睇嚟係特登呼應番15年前訪港喺ATV賀台慶時，要同自己唱生日歌嘅趣事。
至於失去來屆歐聯入場券嘅AC米蘭宣佈，教練加度素同體育總監李安納度齊齊離職。球會表示，佢哋會立即展開新帥挑選過程，期望喺今夏國際冠軍盃等季前熱身賽展開前，能落實人選。加度素喺2017年11月接掌一隊，可惜任教18個月後因無法帶領球隊重奪聯賽前四，確定連續六年無法進軍歐聯，因而「落鑊」。至於前巴西國腳李安納度喺去年七月先獲聘體育總監一職，但因盲撐加度素下備受壓力，最後都要引咎辭職。另外，法甲方面，曾執教車路士、熱刺同上海上港嘅葡萄牙籍教練波亞斯，正式落實接替季尾離隊嘅魯迪加西亞，成為馬賽新帥。
