青訓教練就如半個父親，李志堅人稱「堅sir」，也有個外號叫「堅爸」，與多位球員情同父子，今季更與多位子弟兵在發迹地大埔一圓港超聯冠軍夢。冠軍榮譽背後，在兩位兒子面前，堅sir卻自認是一個不及格的父親。
記者：禤家民 攝影：何家達
「喺香港做教練，就好似保母、社工、哥哥、爸爸同教練。」李志堅說，對球員而言，他是一個開明的「爸爸」，「我班球員各有所長，冇必要將條西褲變做牛仔褲。人最重要係溝通，我冇擺自己喺高高在上，我認為我算開明，我諗就算啲球員唔鍾意我，都唔會好憎我啩？」面對球員，堅sir對他出任「爸爸」這個角色尚算滿意，惟面對兩位親生兒子，卻是不合格的爸爸。
投身青訓忽略家庭
「我成日都反省，對自己個仔係差好遠，我一定係唔合格嘅爸爸。最理想係好多時間陪到佢，有啲嘢要一齊見證一齊分享，過去咗就冇。」堅sir道出了青訓教練的哀歌，年輕球員的訓練時間，就是放學後的黃昏晚上，或者是周末假日，這些堅sir本來應該陪伴自己兒子的時間，都用作陪伴別人的小孩。
身為足球教練，堅sir沒有刻意培育兒子向足球發展，但正於大專修讀體育教練課程的22歲長子敖男，現同時在和富大埔實習，堅sir是想培訓他接班嗎？「冇勉強佢，咁啱佢讀緊呢樣，球隊又要人。」敖男小時候曾報讀足總的暑期班，當時堅sir工作繁忙，比敖男年長數年的馮慶燁負責帶他上堂，當時敖男對足球興趣不大，敖男說：「當時同朋友玩特別開心，初初都係因為我係堅sir個仔，佢哋先搵埋我踢，以為我識踢波，其實都係啱啱學。」名將之後有壓力，名帥之後也有壓力，敖男介意靠關係，「細個踢波選拔都驚因為爸爸關係而入選。」堅sir也說：「有年敖男選橫濱U15都失敗，唔會利用身份幫個仔。」那麼，敖男正修讀體育教練課程，會幫他一把嗎？「幫佢觀察佢嘅長處，睇吓有咩需要進修，最起碼了解多啲足球圈，教練圈有咩角色，需要啲咩。」
執教大埔命中注定
不知道敖男日後會否繼續向足球教練方向發展，但他的教練之路，就是與父親一樣，在大埔開始。堅sir與大埔可算是命中注定，廿歲出頭時首次離開家人自住，正正是大埔運動場旁邊的太湖花園，教練之路也是大埔區幼苗開始，也在當時遇上「堅家軍」。堅sir之後執教過深水埗，與「堅家軍」一起首嘗職業聯賽滋味，輾轉去過橫濱、澳滌、飛馬，到2016年加盟大埔。05年，堅sir與「堅家軍」代表大埔贏得曼聯超級盃，當時他已許下宏願，他日要贏頂級聯賽冠軍；兜兜轉轉，14年後，他的願望在大埔實現。堅sir憶起與大埔的點滴：「其實都幾好笑，一切喺大埔開始，又係嗰班人，就連曼聯超級盃都係代表大埔。」只是球壇離離合合，當時的「堅家軍」，有些現效力其他球會，有些更已放棄職業足球，或者被職業足球放棄，「其實初初嚟大埔，都係得四個『堅家軍』。離離合合好正常，最重要搵到啱自己嘅地方。唔一定係我帶出嚟嗰班，一啲合作一、兩年嘅球員都好樂意繼續合作，唔使分類，好似翟廷𥧌、曾文輝咁，合作得好好，就算有其他會搵佢哋，都係想留低，呢一點令我好開心。」
可別忘記，大埔曾被堅sir踢落乙組（當時次級聯賽）。13年5月4日，當季的港甲大審判日，堅sir執教的橫濱在小西灣迎戰大埔，補時階段大埔入球領先2:1，令橫濱陷降班邊緣，但橫濱卻有福田健二絕殺，以2:2逼和大埔，令後者降班，堅sir說：「𠵱家諗番覺得好好玩，當時啲助教留意其他幾隊形勢，一話唔好失波就失波，後尾知道一輸就係自己降班嘅時候，覺得成個天都係黑色，跟住又反勝冇事。」巧合的是，大埔擊敗富力鎖定冠軍，剛好又是5月4日，六年時間，仇人變功臣。覺得自己還大埔一個冠軍嗎？「咁又冇，反而初初教大埔時驚佢哋唔鍾意自己，其實各為其主箒。」
目標達到去向成疑
港超聯冠軍到手，多年的目標達成了，然後呢？「人總要有目標，有遠有近，一步一步。真係圓夢攞聯賽冠軍，唔會覺得係咩大使命，算係對自己有交代。」今季堅sir初戰亞協盃，見識到北韓球隊的實力，甚至想簽入北韓球員，「好欣賞北韓球員，好啱現代足球。」下個目標，堅sir想拉近與北韓的距離，真正達到亞協水平，「大埔（在亞協）都係輸過畀一隊波，呢個經驗好重要，要點預備亞協，點投放資源。大埔代表香港較為重要，亞協係一個表現香港足球嘅平台，下一個目標係小組出線。」只是，這個目標也未必會與大埔一起達成，因為到目前為止，堅sir仍未明確表示來季會留隊。