近日不斷收到藍絲帶朋友嘅「轉發訊息（Forwarded）」，內容唔係講華為就係講逃犯條例。愛國人士建制派財雄勢大，只要中聯辦主任寫兩個字，就會有香港身份證商人（即內地移民香港富豪）出二三千萬去買，所以做事容易，搵寫手有寫手，搵轉發有轉發，同佢地打文宣戰，泛民輸梗。
關於逃犯條例嘅標準寫手，大致係講：（一）修訂因台灣謀殺案而來，堵塞法律漏洞，（二）內地有逃犯在港，不針對香港人，商界毋須擔心，（三）港法港審不可行，（四）市民多誤解。
翻來覆去，主要係市民誤解，蘋果日報誤導。但係如左丁山呢類人，對法律認識唔太多，信乜人好？梗係信公信力夠嘅專業人士，即如大律師公會素來公平公正，以普通法論事，位位歷任大律師公會主席都係法律權威，左丁山唔信佢地，唔通信鄭若驊？律政司司長嘅丈夫居然有僭建，在英國美國，係足以被辭職嘅理由，只有在今天香港，政府才可以視而不見，若無其事。信中聯辦？中聯辦有乜法律權威？佢地講法庭為政治服務就識，講三權分立就不以為然，好明顯與香港人思維完全不同，點信佢地呀！信林鄭李家超？睇完眾新聞尹兆麟篇文，你就會長嘆一聲咯。
如果修訂條例係為咗引渡內地逃港貪官富豪，我地驚唔驚？原則上呢班人已經係香港居民，應受香港法律保護及香港法庭審訊，唔通佢地拿了香港身份證，仍然無此權利？點講得通呀。再者，呢班內地富豪逃犯，第一站係香港，第二站就係搬錢往美國或新加坡做信託基金，人就去咗外地拿外國護照，點在香港捉佢地？仲未走嘅內地富豪，必是笨蛋，IQ低之輩，唔係銀行界人士點解會細細聲講：「益晒新加坡！」
講到華為，收到嘅轉發短訊就係斥責美國侵略，掠奪世界資源，帝國主義霸凌，以及華為打不死，有自主自強能力，華為5G領先世界。以前本欄引述過內地科學家為研發中國自主CPU，吃盡苦頭一事，該文作者嘆息：「過得了IBM，過不了微軟，過得了微軟，過不了Android！」依家竟然靈驗，Google禁止授權華為使用Android，IT專家話係大件事，華為手機在國際市場會變為影相機，得物無所用（內地則早已禁用Google，影響不大），過去Nokia開發運作系統，大敗收場，Nokia手機瓜晒，華為有內地市場，可以頂得吓，但是否過得了Android呢一關？大有疑問。