建制派要向中聯辦負責早已係公開嘅秘密，見諸政改甩轆要去西環謝罪，選舉當選要去西環謝票，但都叫做收收埋埋。不過，月中《國歌法》法案委員會爭啲流會，委員會主席兼建制派班長廖長江同副主席張國鈞坐喺主席台上密偈，唔小心公開爆如果流會的話，「西環實拆天」，原來係未熄咪。
貼紙提示收緊音
唔知係唔怕醜定唔怕死，今日有議員發現主席咪上有塊貼紙提示主席收音進行中，仲增設咗手動熄咪功能。
民主黨鄺俊宇今日喺同一個會議室主持福利事務委員會嘅時候就發現，主席咪上貼咗張新貼紙，寫住「綠燈亮起表示此咪正在收音」，仲有箭嘴指示議員關閉收音模式，鄺神都話：「咁唔驚（西環）拆天了，好體貼」。廖長江其實一直都未公開解釋西環拆天論係乜意思，咁解決問題梗係唔係出嚟同公眾解釋啦，而係避免重複犯錯吖嘛。
秘書處回覆八方查詢時話，係按廖長江嘅建議，兼且考慮到委員會主席或主持會議嘅議員，不時有需要諮詢身邊嘅副主席硂秘書或法律顧問意見同討論，所以近日喺會議室1、2及3主席座位嘅咪上增設手動開關功能。開慣綠燈嘅建制派可能對燈號唔太敏感，但係對於指示同「溫提」應該上心一啲囉。
李八方