阿士東維拉重返英超！星期一喺溫布萊舉行嘅英冠升班附加賽決賽，維拉憑安華艾加斯同埋約翰麥甘尼入波，以2:1擊敗由名將林柏特首季領軍嘅打比郡，相距三季重返英超。維拉死忠球迷威廉王子喺看台激動慶祝之餘，原來索爆嘅公鹿太子女Mallory Edens，佢老竇都係維拉大股東之一，下季英超可能不時會見到Mallory嚟睇波！
維拉喺今季早段炒咗布魯士，改由甸恩史密夫領軍，搵埋車路士名將泰利做助教，成績一路進步，附加賽四強淘汰西布朗入決賽。維拉今場有「英國周柏豪」基亞利殊、譚美阿巴謙領軍；打比郡都有艾殊利高爾、侯度史東打正選。完半場前一分鐘，維拉嘅安華艾加斯頭槌頂入，維拉半場領先一粒。
升上英超收入至少達17億
下半場59分鐘，打比郡門將基利奧斯出迎失誤，俾維拉嘅約翰麥甘尼撞入空門。完場前九分鐘打比郡由馬田韋漢破蛋，維拉最終以2:1擊敗打比郡，下季連同諾域治、錫菲聯升上英超，收入即刻暴增，預計呢個英超席位至少值1.7億鎊（約17億港元），反觀打比郡隨時星散，領隊林柏特都盛傳會轉教車路士。
維拉升班，除咗威廉王子好開心，就連其他19支英超隊嘅男球迷都可能會高興，事關NBA球隊公鹿太子女Mallory Edens，原來佢老竇Wes Edens係維拉大股東之一，佢同埃及富商Nassef Sawiris上年7月夾份，買咗中國商人夏建統手上55%嘅維拉股份，所以Mallory喺星期一賽後都有落草地影相。
夏建統應承前主席有錢分
而且，當年維拉降班後以6,000萬鎊賣盤畀夏建統嘅美國商人利拿，都分番成3,000萬鎊，因為當日交易條款寫明，如果維拉賣盤三年內升番班，利拿就可拎到呢筆錢，而且如果維拉下季喺英超唔使降班，利拿可以再拎多1,000萬鎊，都咪話唔肥！