台灣剛通過同性婚姻合法化，成為亞洲第一個同性婚姻合法地區，相反在香港，一個男男拖手的廣告，卻傳被港鐵及機管局拒登。王敏德和馬詩慧的大女王曼喜於14年出櫃，她在Ig貼出一張與女友人拖手的圖片作無聲抗議，近年亦積極參與爭取平權的活動，她說：「希望有一日喺香港可以結到婚。」
撰文：梁錦雯
攝影：沈健程
髮型：Jaden R
26歲的王曼喜日前公開和拍拖一年的女友Anne在中環出席同性平權活動，她是一個敢於認愛的星二代，身上有不少紋身，其中右手臂紋了「Love never fails」，因感受身邊很多愛而有感而發，亦是她的人生金句。早前她亦在灣仔舉行了人生首個攝影展，以「intimacy」為題材，在她的鏡頭下，捕捉了五對同性戀人臨睡前一刻的「床照」。
唔敢講大話
王曼喜接受本報訪問時說：「每一對情侶尋找緊愛嘅時候，都係想搵到家嘅感覺，而我就覺得每晚可以同伴侶瞓同一張床，無論做緊乜都好，可能傾偈、瞓着覺、打緊機，我都覺得呢啲moment係最親密。其實我覺得每一對情侶，無論直定攣，都會有呢種渴望。」
提到家，王曼喜與家人關係密切，由於是大女，父母對她稍為嚴厲，以前出夜街10時就要回到家，又不准去同學家中過夜，相反對她的弟妹就寬鬆得多。問到被母親罰得最勁的一次，她說：「中學時，我呃佢話去跳舞，其實我嗰時已經同女仔一齊，去咗搵我女朋友。佢發現我冇去跳舞，打鑼搵我，我又唔聽電話，返到屋企就轟炸我。嗰陣我啱啱買咗新電話，仲好有心機貼晒水晶閃石，我爹哋一嘢掟爛咗碎晒，好難忘，以後唔敢講大話。」
家人的包容
對於出櫃，王曼喜經歷了一般同性戀人遇到的五部曲，由尋找、掙扎、迷惘、接受，到最後完全包容自己，最重要是獲得家人的包容及支持，走向彩虹的天地。她笑言google自己時，最不想睇的新聞是當年被傳媒撞到正與女友約會，要打電話向媽咪求救，現在回想起來，都是人生經歷，她說：「其實我一開始come out，係媽咪揭穿我，當時22歲，視像緊我嘅女友，佢好簡單問咗句『你同邊個視像？』我就答朋友，佢就話係咩？唔似喎！開始咗呢個topic。媽咪唔係幾鍾意，有幾大拗撬，始終媽咪希望佢哋小朋友結婚、有老公，有得自己生小朋友。父母未必一下子明白，如果未必贊同，希望有一種愛嘅感覺，我始終都係愛你嘅人，希望活得快樂，我覺得媽咪嗰陣思考咗呢個位。」
現時的王曼喜活得自在，近年積極參加不少平權活動，希望幫到一些人克服她曾經歷過的關口，會否多了一點使命？她笑言：「唔會講到咁大，只係希望為同志發多啲聲音，點解我用影相呢樣嘢，就係因為影相好講到故事出嚟，想表達到我哋故事同你哋故事都係一樣，都係想開心、想搵愛，所以我唔會當係一個使命，只係想感染多啲人，明白多啲我哋。」
希望有小孩
在香港，平權落後於不少地方，而台灣剛通過同婚專法，問她還有甚麼目標？王曼喜說：「我希望有一日喺香港可以結到婚，等到香港有得結。我𠵱家唔係急，始終都係我屋企，如果真係當喺香港結唔到，都會想香港認同我同伴侶嘅關係。」除了想在出生的地方結婚，下一步會否與同性伴侶有自己的小朋友？她說：「大家都有個希望喺度。」
影人真性情
王曼喜在洛杉磯的時裝設計學院畢業，現在學以致用，擁有個人時裝品牌，又與不少星二代一樣，會做KOL、模特兒，現在更嘗試攝影。她以「興趣」來形容對攝影的喜愛，偶像是善於拍攝人像的Annie Leibovitz。問到喜歡的攝影題材？她直言最愛影人：「乜人我都影，鍾意影表情，一啲好真實流露出嚟感情，我屋企人、朋友都成日俾我影，街上啲伴侶親密鏡頭、小朋友、老人家，乜人都好。」
表達親密
首個攝影展王曼喜以自身出發，籌備了一個月，以同性戀人床照為構圖，想表達「親密」的訊息。問拍攝時有甚麼困難？她指除了要找到願意出鏡的同性戀人，還要拍攝時跟他們傾偈熱身：「希望佢哋表露最真實一面，叫佢哋最自然、放鬆，問番佢哋平時睡姿係點？或者有乜習慣？慢慢佢哋就會騷畀我睇平時點攬住，可能會放手，我就捕捉佢哋嘅姿態。」
更多精采時尚內容，盡在 http://add.appledaily.com。