成立咗三年嘅香港眾志舊年由政黨轉型做民間團體，眾志噚晚舉行黨慶晚宴，主題係「Becoming」，主席林朗彥就話呢個主題係講番過去一年嘅轉變，冇得參與選舉之後，佢哋主要就係做新媒體、青年組織同埋直接抗爭嘅工作。
不過今年眾志嘅黨慶就少咗一個重要人物，就係秘書長黃之鋒，佢因佔旺案而要再服刑，不過眾志就整咗塊黃之鋒人形企牌畀人合照同打卡，而之鋒都喺獄中為三周年嘅晚宴寫咗一封信，由林朗彥喺晚宴上讀出，佢話希望四周年時唔好再有人因坐監而缺席。林朗彥仲話，有一圍枱留咗畀一班仲喺監獄服緊刑嘅政治犯，呢一張空枱會畀出席者寫信給一班政治犯，一班常委都喺台上讀出一班政治犯嘅名同刑期，希望唔好忘記佢哋，又呼籲大家6月9號要企出嚟參加反送中遊行。
晚宴亦有輕鬆時間，請咗樂隊Boyz' Reborn表演，另外眾志副主席鄭家朗、常委何嘉柔、成員周庭亦都着埋水手裝，跳咗一首日本歌《Megu Megu Endless Fire Night》。