立法會秘書處在秘書長陳維安領導下，大概做到頭昏眼花，畀近幾個星期嘅立法會開會事件衝擊到手忙腳亂，商議國歌法嘅委員會流會之後，辦事人員竟然唔記得熄咪，於是主席廖長江嘅金句：「西環會拆天」，傳遍香港，在WhatsApp瘋傳，成為搞笑娛樂。廖長江係資深大律師，中華總商會功能組別議員，平時公開說話好小心謹慎，點知呢次口吐真言，就被立法會秘書處出賣咗，當然笑唔出。但廣大市民平時懷疑西環幕後指揮建制派議員做事、投票，苦無證據，呢次係雞食放光蟲嘞。有一位傳媒人對左丁山講：「陳維安係咁上下水平㗎嘞，佢做教育局副局長嘅時候，強推電子書，曾被一位書商老闆痛斥，眨吓眼過咗幾年，你睇吓香港學校嘅電子書有無進展？」
咁又唔知噃，但陳先生讀男拔萃，普林斯頓，哈佛，UPenn，學歷嚇死人，但竟然講英文要畀馮睎乾「修理」，確係尷尬啲。以前問過一位書商，佢對陳先生之學歷驚為天人，但亦減低咗佢要送兒子去讀長春藤大學嘅興奮程度。
王志民唔知識唔識解廣東話「拆天」嘅意思，香港人就當然心領神會。近月嘅修訂逃犯條例，弄得滿城風雨，林鄭月娥硬推，由滿懷信心至心急至口硬至手足無措，啲建制派慌亂護航，點知送機會畀泛民大條道理去拉布又拉布，唔知點埋尾！林鄭曾聲稱要在七月十日暑期休會之前要通過修訂案，但依家係五月尾咯，修訂案在立法會仍然寸步難行，點搞？卒之搞到西環拆天，索性扯開假面具，王志民赤膊上陣，召集所有香港人大政協到中聯辦開會發出指示，要求建制派必須統一口徑，齊齊支持逃犯條例修訂案，不得阿支阿左！大人出聲，小人應命，上星期六已見到一啲人大政協冒着酷熱，在街邊叫人簽名支持，真是我見猶憐。冇法啦，為咗搵食啫，咪一於跟黨走，聽黨話，放棄自由的精神，不敢有獨立的思想囉。林鄭無力，西環出面，特區政府以後冇晒公信力，建制派仲會聽林鄭及司局長游說咩，唔去西環收風先至奇，香港正式由港澳辦/中聯辦治港。
一啲人大政協上街出力之時，大把人躲在馬場嘆冷氣，一位半退休老闆講：「依家與朋友食餐飯都煩，梗係分為兩派，講講吓就面左左，其實我地商人心知肚明內地法制如何政治化，由黨委話事，大家都試過報稅天一半地一半，與書記講掂就得。現在點解仲要違背良心，講內地法制公平，進步呢？搵食啫，唔駛重複謊言呀嗎？」唉，人大政協全是建制派議員支持者，佢地被喝令歸邊之後，李家超即刻在5月20日講要立法會大會在6月12日二讀通過草案，踐踏議會傳統莫此為甚！