北京落聖旨要通過送中條例，港澳辦、中聯辦自然要落力威逼利誘各方全力支持惡法，要向北京交功課當然唔只佢哋，外交部駐港特派員公署日前係網站發文，原來佢哋搞咗個外國傳媒「吹風會」，包括路透社、共同社、金融時報、CNN、CNBC駐港機構負責人同記者都有參加，該署副特派員宋如安喺會入面話希望外媒「公正、平衡、客觀」報道今次修例，為此貢獻「正能量」，但隻字不提外媒代表有乜提問。
毛孟靜寸「儍儍哋」
八方聽聞外交部駐港特派員公署除咗搵外媒，亦有搵外國駐港領事官員解畫，但有知情人士同八方講，有見過公署代表嘅外國駐港領事官員，冇一個人畀佢哋影響到，「人哋係民主法治國家，點會認同中共嘅歪理？」至於外媒呢？曾喺外國通訊社做記者嘅毛孟靜同八方講，作為傳媒唔會缺席，但一定唔會俾呢類「吹風會」影響，仲話公署以為自己係中宣部，以為能如在內地般向外媒「洗腦」，想外媒報道黨思想真係「儍儍哋」。
李八方