曼聯今夏面臨重組，領隊蘇斯克查梗係想球會「泵水」增兵，但有消息話，紅魔執行副主席活華特吸取教訓，勒令今季簽人唔可以再亂使錢，仲要以簽年青球員作為大方向，睇嚟蘇B今夏有排煩。
據報，曼聯已經接近完成喺史雲斯以1,500萬鎊（約1.5億港元）買入21歲翼鋒丹尼爾占士（小圖），而今夏首宗收購，竟係一位嚟自英冠嘅無名小將，令唔少人費解。話說活華特已警告蘇B，唔好做唔合理嘅收購，皆因球會之前幾任領隊都簽過貨不對辦嘅球員，好似摩連奴上年夏天豪使5,000萬鎊買入冇料到嘅費特洛迪古斯，而全英最高年薪嘅阿歷斯山齊士，同曾破世界轉會費紀錄嘅保羅普巴，兩人嘅表現都不似預期，所以活華特唔想蘇B重蹈覆轍。
所以，曼聯家陣個方針係簽啲好似占士咁唔太出名嘅小將，據報蘇B已開出一份名單，當中包括富咸快翼賴恩施斯隆同紐卡素中場桑恩朗達夫，原本佢亦對水晶宮21歲右閘雲比沙卡有興趣，但賣家標價高達6,000萬鎊，「手緊」嘅蘇B或要打退堂鼓，寧願花更多時間培訓陣中相同位置嘅葡萄牙小將達洛治。
隊長臂章𠱁普巴留隊
冇錢買世界級球員，咁蘇B就要諗辦法保住陣中一班大帝，其中為咗挽留有意過檔皇家馬德里嘅普巴，蘇B準備畀佢做隊長。另一樣對蘇B較正面嘅訊息，就係皇馬啱啱同卻奧斯續約，令普巴轉會可能性降低，有媒體仲話皇馬想簽普巴一事，其實一直只係教練施丹嘅個人意願，但家陣同卻奧斯續約後，施丹已經冇咁多聲出。考慮到普巴2021年先約滿紅魔，加上傳紅魔要收1.7億鎊先放人，皇馬高層就寧願集中火力斟下年夏天就約滿車路士嘅夏薩特。
迪基亞又再拒絕續約
蘇B留普巴嘅機會，或者比起留門將迪基亞仲高，皆因迪基亞又拒絕咗球會開出嘅續約條件，因為達唔到佢要求嘅35萬鎊周薪，所以紅魔被迫喺今夏賣佢套現，唔係下年就要畀對方自由轉會，而虎視眈眈嘅巴黎聖日耳門就計劃今夏用6,000萬鎊（約6億港元）搶人。