由多蒙特轉投車路士嘅20歲美國國腳基斯甸普列錫，星期二正式以車仔球員身份喺史丹福橋亮相。普列錫接受訪問嗰陣話，佢對自己好有要求，「我希望成功，成為車仔嘅一部份同帶嚟影響，呢個係我嘅目標，我會盡力成為最好嘅球員。」至於家陣32歲嘅法國國家隊正選前鋒基奧特，將同車仔延長一年合約，直到下年夏天。
另外據英國傳媒報道，阿仙奴門將施治季尾退休後，下季會重返車仔出任體育總監，不過呢名37歲捷克門將喺社交平台重申，佢會等到踢完歐霸盃決賽，先決定自己嘅未來。
不過有喜亦有悲，前領隊干地喺同車仔嘅勞資糾紛被判勝訴，車仔被判要向干地賠償900萬鎊（約8,900萬港元）。英國《泰晤士報》指，連埋今次對干地嘅賠償，自阿巴莫域治2003年收購車路士以嚟，車仔因為炒領隊而畀嘅賠償金已超過9,000萬鎊，如果車仔今個夏天再炒埋仲有12個月合約喺身嘅沙利，呢個數字將繼續增加。