中美貿易戰持續升溫，早排網上流傳有內地舖頭老闆要「反擊」美國加25%關稅，話明美國人要收多25%錢，但畀香港網民恥笑呢種憤青式「反擊」根本無用，但估唔到香港有人跟風。近日慈雲山鳳德邨崇華街地下嘅香國成醫館，就喺門口掛起橫額，話即日起要向求診嘅美國病人加收25%關稅喎。
事件經網上瘋傳，網民議論紛紛，有人就覺得得啖笑囉，話醫館都係抽吓水啫，幾時會有美國人嚟睇症吖？
只寫中文 叫人諮詢美國大使館
嗰幅橫額掛正喺醫館招牌之下，紅底白字相當搶眼，上面啲字仲鬼咁長，寫住：「即日起，美國國籍游（遊）客在本醫館就診須加收25%關稅，煩請知曉！若有不便，請咨（諮）詢美國大使館！」呢幅橫額正係內地某啲商舖門口一模一樣。
八方就搵到醫館嘅香醫師，佢話幅橫額係喺20號掛嘅，係要回應美國對中國企業嘅打壓，破壞自由貿易，仲強調咁樣做「係中國人應該有嘅表態嚟」。
不過，成幅橫額用中文寫，一隻英文字都冇，究竟醫館有冇外國人嚟幫襯呢？香醫師就拍心口話有病人打過電話嚟問。不過咁，自橫額掛出之後，暫時都未有美國人嚟求診。佢仲話除非美國取消關稅，或中美達成協議，否則幅橫額會一直掛喎。