美國商務部上周四將華為列入黑名單，觸發Google一度宣佈暫停與華為部份業務往來，日後使用Android嘅華為手機，係冇得用Gmail、Google Map等應用程式，咁自稱華為忠實粉絲嘅行政會議成員、新民黨主席葉劉淑儀又有冇影響？葉劉接受訪問，大大聲話新民黨早已棄用Gmail，但冇耐就俾網民踢爆，佢哋個黨多個區議員仲係用Gmail喎！真係又一個口裏說不，身體卻很誠實嘅例子。
葉劉前日接受「香港01」訪問，大大聲話「新民黨已棄用Gmail多年」，因為幾年前曾遭黑客「國家級攻擊」，令Gmail系統一度癱瘓，佢亦對Gmail「大失信心」，所以就搵本地軟件商，為新民黨度身訂做嘅全新電郵系統。
新民黨七議員有account
不過有網民發現，其實大批新民黨區議員仲用緊Gmail，八方上網睇過，至少七個新民黨區議員，喺佢哋所屬嘅官方區議會網站嘅電郵地址一欄，都只填上Gmail戶口，而唔係葉劉訪問中所講嘅「全新電郵系統」，包括葉劉「愛將」陳家珮、黃卓健、黃嘉榮、唐學良、陳敏娟、傅曉琳以及身兼沙田區議會主席嘅何厚祥。其中一個擁有誠實身體嘅陳敏娟覆八方，話暫時未收到指示要轉電郵，仲要睇睇先，但就算要轉都唔覺得麻煩，因為以前都試過轉電郵，總之一切都係收到指示再決定。
網民無不恥笑葉劉，有人仲揶揄葉劉訪問中嘅講法原來只係「笑話一則」。八方就此事問過葉劉，佢堅稱：「新民黨係唔用Gmail」，但就話：「我哋有啲區議員，佢自己有私人account，係佢嘅事。」
李八方