【黑鏡線索】
華為俾美國禁，有人話係打響科技戰第一槍，有人話上年搞中興嗰次先係第一槍。其實，第一槍老早打響，不過係中國打出。呢十幾年，一方面，中國輸入美國軟件同高端硬件，又同時不斷嘗試打入國外市場，但另一邊廂，喺互聯網裏面，就唔畀Google、facebook、Twitter及一眾電子媒體喺中國做生意。呢個唔平衡，呢個非自由貿易，成行都知，係人都知，而家美國先嚟做嘢，手腳又真係好慢。
當然，美國出口去中國，對美國某啲公司有着數。硬件科研嘅嘢，最大嘅成本，好多係fixed cost，一旦成功，最賺錢就係將個fixed cost以量去攤分，而中國市場，就好幫到跑量呢一瓣。而家冇得賣去中國，平均成本一定受上升壓力，睇吓市場決定，科企啃幾多，消費者啃幾多。
其中一間美企，未正式受影響，但越嚟越危險嘅，係Apple。Google、facebook等等，反正都被禁，本來無一物，都唔可以再差得去邊。但蘋果好大比例嘅生意嚟自中國，而同時間，又有好大比例嘅生產出自中國。咁當打起上嚟中國拉籌碼，除咗稀土，好快就排到蘋果。而美國方面，已經放咗好多中國製產品入關稅懲罰清單，如果要再揀嘢抽，蘋果手機都唔係話排得咁遠。
蘋果手機不遠了
蘋果喺中國搵錢有呢類潛在風險，呢個晨早知，管理層非常清楚，股東唔多唔少都有一定心理準備，遲早要還，不過唔知幾時。而家只係將個鐘校快啲。我估，逐漸轉型賣多啲月費服務，其中一個目的，就係減低對中國市場嘅依賴。呢個轉型有排做，但時間似乎唔係企喺佢哋嗰邊。
當科技戰持續，越來越多高端技術不得輸入中國，跟住會點？中國企業冇得揀，正如華為話齋，咪自己研發囉。華為聲稱，一早有Plan B，兩手準備定，唔怕被禁。首先，就算作業系統同高端硬件有Plan B，冇咗Google Store同啲app，國際市場凍過水。第二，有Plan B，唔代表個Plan成熟到隨時出得。外界冇可能知係真係假，我只可以話，如果佢真有個Plan B出得街，只不過一直忍住唔出，就真係超出咗業界正常邏輯認知，寫個服字，抵佢贏。
香港歸邊一邊？
無論今次Trump最後放唔放水，經此幾役，中國一定鐵定心要自力更生。其實一早好多人講，本身中國城牆裏面自己係一個內聯網，同世界嘅互聯網，越行越遠。如果騰訊想，自己另起爐灶，定個新嘅protocol，應該可以令全中國都照跟。橫掂係咁，就索性落到最底層，由晶片開始，殺上網絡，再打上app，一條龍re-imagine中國內聯網，學Elon Musk話齋，從first principles開始嚟過，例如一開始就已經假設內聯網係用嚟監控同維穩，呢個應該係科技史上最大嘅revamp，勁過起條萬里長城。
當中國內聯同世界互聯網分家，即係例如中國有一日只用中國手機，唔畀買敵人嘅iPhone，而中國手機只係上到內聯網嘅時候，咁香港會歸邊一邊呢？當SF等城市推出禁止在公眾場合使用面孔識辨，去保障個人私隱，而中國就將中央監控推到技術極限嘅時候，香港會跌入邊一邊？香港政府近年力吹大灣區，硬上送中法，不惜一切融合入中國，自絕於世界嘅取態，再清楚不過。
撰文：宋漢生