啱啱過去嘅星期日贏咗英足盃，連埋英超同英聯盃成為英本土「三冠王」嘅曼城，星期二朝早喺曼徹斯特市舉行勝利巡遊，全隊上下包括領隊哥迪奧拿、離隊在即嘅隊長高柏尼、同樣贏得英足盃嘅女子隊都有份參加，數以萬計嘅藍月球迷就喺街上揮動旗幟同歡呼，將整個曼市染成藍色。雖然巡遊期間，網上一度流傳曼城跌爛英超冠軍獎盃，但後來實證只係曼城官方嘅惡搞片！
巡遊後曼城繼續慶祝活動，即將轉投安德列治做球員兼教練嘅高柏尼就話，對李斯特城射入死角靚波一刻，就知道自己喺曼城嘅任務已經完成，為藍月已經竭盡所能；哥帥就話大家都會掛住高柏尼，相信佢遲早會以其他身份返嚟曼城。另外ESPN報道，歐洲足協已就曼城疑似違反財政公平原則，成立五人仲裁小組，不過其中竟然有一個係阿聯酋政府嘅人，不禁令人聯想同曼城班人阿聯酋王室有關係囉！
