《逃犯條例》修訂惹爭議，唔認聽西環指揮嘅特首林鄭月娥，一聽見西環王志民吹雞，噚日立即將送中例直上大會，唔只聽話，直頭係西環嘅扯線公仔！最諷刺係中聯辦喺剛過去嘅周末同周日舉行開放日，王志民就大玩扯線公仔，唔知係咪有心向娥特及建制派施下馬威？
張達明︰公仔好打得
西環開放日梗係請同聲同氣嘅市民參觀，包括堅定愛國愛黨嘅工聯會志願服務團成員，其中一項表演就係由福建泉州嘅提線木偶團做表演，王志民更加上台獻技，笑晒口咁示範玩扯線公仔，據知在場人士都覺得佢玩得幾純熟，唔通因為平時喺現實世界玩得娥特同班建制派多，訓練有素？
而同樣上台試玩嘅工聯會會長兼港區人大代表吳秋北，望住王志民扯線扯到得心應手，笑到見牙唔見眼，喺佢眼底下被王志民扯住嘅公仔，會唔會有個身影浮現呢？港大法律學者張達明都有留意王志民玩扯線公仔，佢喺fb話︰「這邊廂我發放林鄭月娥的親筆承諾信件（承諾唔會要求中聯辦拉票），那邊廂工聯會就發放中聯辦主任王志民公開玩扯線公仔的相片，是有心還是無意呢？」仲話「我們的特首是否可以拒絕要求，還是只能成為『好打得』的扯線公仔？」更慨嘆「時窮節乃見，一一垂丹青」。