壹傳媒創辦人黎智英噚日出席外國記者協會（FCC）嘅午餐會演講嗰陣，話《蘋果日報》嘅會員訂閱有300萬人要多得前特首689？事緣係咁嘅，午餐會主持人問到肥佬黎點睇梁振英經常喺自己嘅facebook狙擊《蘋果日報》，佢就話689每日都數住《蘋果》有幾多廣告，呢個方式非常有趣咁去吸引市民注意，提醒咗讀者《蘋果》冇廣告，唯一嘅生存方法就係訂閱制，「我諗呢個係點解我哋𠵱家有300萬會員訂閱」。
「有一半人同我哋企喺一齊，就有機會生存下去。」
講起訂閱制，肥佬黎仲有提到壹傳媒同埋成個傳媒行業嘅前景，佢就話壹傳媒已經轉型到網絡世界，𠵱家台灣《蘋果》印刷量有16萬，香港《蘋果》就有10萬，雜誌市場則幾乎死晒，如果淨係停留喺紙媒，唔知仲可以生存幾耐，「𠵱家網絡世界嘅影片比起文字更加重要」。黎智英又話，壹傳媒啱啱推行訂閱制，登記嘅會員數目已經有300萬人，「如果當中有一半人同我哋企喺一齊，就有機會可以生存到下去」，要提供更加多優質同埋豐富嘅內容畀讀者。
李八方